సంతోషాలను మాత్రమే దాచుకుని
బాధలేవీ గుండెని చేరనీకుండా
తాళం వేయడం తెలిస్తే బావుండు
దిగుళ్ళన్నీ బెదిరి పారిపోయేలా......!!
మనసు క్షేమమని మురిసేలాగా
మమతలన్నీ భద్రమని చెప్పేలాగా
మదిని సురక్షితంగా ఉంచుకుని
తాళం చెవిని మెదడులో దాస్తే....
మధుర జ్ఞాపకాల ఖజానాగా
మనసు నిత్య వసంతమై విరిసేది...!!
కలతలేవైనా వచ్చే ముందే
గడియలన్నీ వేసుకుని
మది గదిలోకి చేరకుండా ఆపేసి
ఆ సమయంకాస్తా గడిచిపోయాక
హాయిగా తలపుల తలుపులు తెరిచి
ఆనందాల డోలికల్లో తేలిపోయే
మంత్రమేదైనా తెలిస్తే బాగుండేది.....!!
నేను కూడా సహన మూర్తిని
ప్రశాంత వదనాన్ని అయిపోనా...
చిరునవ్వు తప్ప చిరాకులు తెలియక
పసితనపు రెక్కలతో విహరించనా.......!!
అనుశ్రీ....
134
No comments:
Post a Comment